الدنيا صندوق العجب
الدنيا صندوق العجب :::
ملحمة شعرية باللغة العامية المحكية ...
********
دار الحاج قندار
من دار لدار
لف الحواري والحارات
على ظهره حامل صندوق العجب
بينادي وبيقول
تعالوا يا أطفال
يا أولاد ويا كبار
تفرجوا وشوفوا
صندوق العجب
كاشف الأسرار
تفرج يا فارس يا همام
على عجايب الزمان
شوف العنتر
حامل السيف وبيتمختر
وشوف أبو زيد الهلالي
ما تركني بحالي
تفرج يا عبد الكريم
واقرأ شو المكتوب
حظك في السما مكتوب
قالوا إنك في الدنيا سعيد
والكل حاسدك على تعاستك
شو اللى جرى ف ه الدنيا
وين الخير والتسامح كله راح
قول لهم يا حاج مصباح
شو اللى غير الحال
قال الخال :
الحكاية ما بدها سؤال
قال الحاج قندار :
هي الغيرة والطفر
من السؤال والفقر
قلب الحاج قندار الصورة وقال:
أما تفرج على رقص القرد الميمون
يقفز في الهوى ويلف ويدور
مثل اللى من أكل الفول متخوم
قالوا له : كُل بسكويت وشوكلاطة
قال ليهم : من الجوع
رابط ع بطني زلاطة
وين هو الأكل وين
خليني آكل مثل المفجوع
والله يا حاج قندار
من شهرين ما خشيت الدار
خايف من مراتي ومن أولادي
اللى قتلهم وهلكهم الجوع
وقاعدين بيقولوا في إنَ بالموضوع
يبدو إنو الموضوع سياسي
والله لا في إن في الموضوع ولا في حنه
ولا في زواج ولا في وصال
والموضوع مش سياسي
الموضوع كله تياسي بتياسي
خلي الحال مستور يا حاج قندار
وبلاش فضايح
خايف يطردوني من الدار
لف الصورة الحاج قندار ... وقال :
أما تفرج يا سلام على عجايب الزمان
شوف يا بسبوس
وتفرج على ه الصورة
شوف شو حلوه ه الغندوره
كيف حاضنه حبيبها وبتشبعه بوس
شوفوا صورة ه الطيارة المحتارة
راكب فيها مختار الحارة
اللى عمره ما ركب حمارة
شاف الحلوه من شباك الطيارة
على الشط بتسبح بالميوه هناك
وبسرعة قفز من الشباك
تيلحق بأم السترة والميوه
وقع على الأرض ... ومات
وفي جنازته غنوا لو
الثعلب فات ... فات
وفي ذيله سبع لفات
ومن هبله لحق الغندورة ومات
وبالروح وبالدم نفديك
يا شهد المايوه والحب
مش لسواد عنيك
لكن لأجل مايوه الغندوره
يا اللي ظاهرة في الصورة
قلب الحاج قندار عن الصورة
وقال :
اتفرج يا سبع الزمان
على صورة الشعب الغلبان ...
وشوف أبو الجماجم
رافع في الهوى سلاحه
وما في طخ رصاص
ولا حتى في قدح زناد
ضحكوا عليه الأولاد ...
وقالوا لو :
طخ في الهوى طلق وطلقين
خلينا نشوف ... وين الحمام بيطير وين
وما تقول إنك حتجيب الذيب من ذيله
ولا حتحرر النهار من ليله
وما تحكي حكايات
كلها خرافات بخرافات
لا شاف شعبنا تحرير
ولا عمر السلام بيصير
قلب الحاج قندار وغير الصورة
وبانت صورة الزعيم الصنديد
مثل القرد المهزوم في قفص الحديد
بعد ما كان آكل وشارب
وحقوق الشعب سارق وناهب
هتف الأولاد ... بالروح بالدم
نفديك يا زعيم
والله ثلاثين سنه ما خليت شيء لإبليس
كل الشعب بسببك صار فقير و تعيس
غور عنا بلا رجعة إلنا
واتركنا وخلينا نشعر بس يوم بالعيد
ونحس بنشوة انتصار الثورة
مش بربيع عربي مزيف
ولا حورية جميلة وحوره
مثل العريس المجذوب
لا هو مقبول ولا هو محبوب
هو مضحوك عليه
وعامل حاله زعيم ثورة
ضحك الأطفال وقالوا :
تعيش حركة التصحيح والثورة
قلب الحاج قندار عن الصورة
وبانت صورة الزعيمة المستور
بتحلم بتحرير المرأة
من العنوسة والحسرة
ويا حسرة على الحسرة
ما في هدوم تستر العورة
كلها تكشف الخصر والسرة
وبتقول هذا حضارة وتطور
وهذا أبداً مش تهور
أما تفرج يا سلام
على عجايب الزمان
كان من زمان
كان في عنتره وشيبوب
وبعده كان صلاح الدين المحبوب
واليوم صار الشعب على أمره مغلوب
وما ظل زعيم محبوب
كلهم كاذب ومكذوب
صفق الاولاد للصورة
صورة الأقصى والصخرة
وهتفوا وين العرب وين
وين الملايين ... يا حسرة
أقفل الحاج قندار
صندوق العجب
وقال مع السلامة
مروح أنا للدار
وبكره في صورة جديده
وحكاية فيها الدهشة والعجب
د. عز الدين حسين أبو صفية ،،،
